星期六去左中環, 其實本來係去揾一間鋪頭 (一間雲吞麵鋪.)
以為好近中環既大街, 原來要上山先揾到, 咁大個人都係第一次行, 第一次行個條起左好耐既行人電梯.
食左麵之後行上去, 行到擺花街既一間餅店 (好出名既, 唔想係度公開名, 因為係香港人一定知道個名.), 賣左 2 打蛋撻 (一半黃, 一半白.), 覺得黃既比白好食, 間鋪頭出面好多人排隊.
之後行到去就快重建既 GRAHAM STREET, 發現好多外國人係度影相, 其實唔止個條街, 中間穿過 GRAHAM STREET 既威靈頓街都好多人影相 (因為係街市), 同埋有好多舊式既鋪頭, 舊到你以為已經消失左好耐. 好似一間賣米既鋪, 仲用緊個 D 用兩黎做計算既秤, 不過好快就會因為重建而消失.
一個人搭電梯上山, 見到好多外國遊客係度影 D 掛住中式招牌既街, 我覺得個 D 街就係香港既 ICON, 就好似上海既老街同外灘, 京都既清水寺, 紐約既格林威治村一樣, 係代表個個城市地道風情, 而唔可以用現代化既新建築取代.
政府保留喜帖街幾棟有特色既建築物係好事, 希望佢地可以將呢個方法推廣到其他重建項目上, 或者用仿古既建築設計去重建. 始終一個城市要有佢自己既 ICON.
Subscribe to:
Post Comments (Atom)
0 意見:
Post a Comment